Javascript DHTML Drop Down Menu Powered by dhtml-menu-builder.com


"حكي فاضي"


خليل بواب :: 2016-10-09 [00:50]::
شو فيها اذا رجعت ع بيتك، وكنت من الشوب عايف حالك… وجيت بدك تدور المكيف ولقيت الكهربا مقطوعة وديجونتير اشتراكك تك، ولو شو صار بالدني! … بسيطة زيد اشتراكك وادفعلك شوية مصاري زيادة بتبورد وبيمشي الحال! …
وشو بيصير عليك اذا سهرت عالعتم؟! اذا ما بتحب العتم جيب قنديل كاز وضوي واسهر وخلي اولادك يدرسوا على نور القنديل! في احلى من انك تسهر هيك سهرة رومانسية مع زوجتك!؟ يعني مش عارف شو المشكلة! ،
لك يا زلمي قول الحمدلله انو عنا كاز وعنا اشتراكات كهربا بالبلد … يعني بدك ما يستوردوا مازوت وتنقطع أرزاق المسؤولين ياخيي المهم هني مضويين وحياتن منورين ومن جيوبن ولا ليرة دافعين… ليش بدها تكون عينك ضيقة!؟ مش بيكفي انن عم يتعبوا عشان الشعب… لك بيكفي انن عم يتحملوا التصوير والبرامج التلفزيونية والاضاءة وفلاشات الكاميرات يللي كل الوقت عم تلمع بعيونن عنجد اجادهن! جبل ما بيحمل هالحمل خلينا بلا كهربا ونفضي جيوبنا عالاشتراكات! عالأقل كرمال عيونن عنجد عيب علينا الحقيقة نحنا تخناها وما بيعجبنا العجب!