Javascript DHTML Drop Down Menu Powered by dhtml-menu-builder.com


"اشرب من البحر"


خليل بواب :: 2016-12-16 [11:50]::
مش عارف شو قصتك بتعصب وبتتوتر لما ما بتلاقي بالحنفية ميّ ! القصة مش حرزانة فكر شوي وكل مشكلة الها حل، ما انت عم تدفع رسوم المي السنوية للدولة وبنفس الوقت عم تشتري ميّ للشرب والطبخ شو بيصير لو اشتريت كل كم يوم للإستخدام المنزلي صهريج ميّ …!

يا خيي لو انو بعز الشتي والمطر نازل شلالات وبحنفيتك ما في ولا نقطة ميّ، لازم الواحد يضحي كرمال البلد طيب احسبها معي اذا جابولك الميّ كيف بدن يربحوا مصالح تعباية الميّ وكيف بدو يصير في ألف نوع ميّ معدنية وطبيعية وكيف بدن يعملوا العصير الصناعي والمشروبات الغازية والكحولية وكيف بدن يشتغلوا مصانع القناني البلاستيكية…! طيب وكيف بدن يستفيدوا الكبار ويعملوا ثروات! ويعني بدك المزارعين ما يسقوا البساتين ولو كان على حساب عطش المواطنين! وبحال انضربت الزراعة بيوقف التصدير وبتتلف المنتوجات وبتصير الدولة بدها تعوض عالمزارعين! يعني عشان خاطرك تنضرب بالبلد الصناعة والتجارة والزراعة…! طيب وكيف بدها تتعبى المسابح يعني معقول انت كمان كرمال يكون عندك ميّ تنضرب السياحة ويصير عنا إفلاس وتفرط البلد اقتصادياً…! اعمل تقنين بإستعمالك للميّ ما كل اهل البلد عايشين بالحرمان والتقنين… لازم تكون تعودت يا بني آدم!… وبعدين تاع ل قلك مش كل ما انت بتطالب بالميّ بيقلك المسؤول روح انقلع اشرب من البحر! طيب ما الحق معو كيف ما كان انظف لأنه أشفى حال من ميّة الشرب الممزوجة بالمجارير… عندك البحر عبي منه وحلّي ميّتو ما هيي هيي صالحة للشرب والغسيل والتنظيف والجلي، أربعة بواحد!

بما انه ثروتنا من المياه رايحة عالبحر والآبار الجوفية عم بتنشف، ولأنو لحد هلق ميّة البحر بعدها ببلاش لحق حالك قبل ما تصير بمصاري وتزيد عليك الفواتير، خلص خلصنا عاد واستحي على دمك واشرب من البحر وريحنا منك ومن نقك.
ما بعرف ليش نحنا المواطنين بس يحطونا على كترة الطلبات والإعتراضات وجعدنة الحكي عالفاضي!