باسيل: إمّا أن نتّفق على إصلاح الدولة وإمّا أن نعود لـ13 نيسان!

في ذكرى الحرب اللبنانية، أعلن رئيس "التيار الوطنيّ الحرّ" النائب جبران باسيل أنّ "13 نيسان 75 بداية حروب فجرت لبنان، كانت حروب الآخرين على أرضنا، إنّما أيضًا كانت حروبنا على بعضنا بسبب فشل دولتنا". 
وأضاف في فيديو نشره على منصة "أكس": "الكل دفع الثمن: ناس ماتت، ناس إنصابت وناس خسرت أملاك وأموال، بس الأصعب الناس يلّي إنفقدت ولليوم ما إنعرف مصيرها نحنا قدمنا قانون لكشف مصيرهم لأن من حق أهلهم يعرفوا الحقيقة، وهيك بيكون العلاج الفعلي لختم جروح الحرب. كمان الحقيقة من حق الأجيال الصاعدة لتعرف إنو الإقتتال الداخلي والشحن الطائفي والتحريض واللعب على الغرائز ما بيوصّلوا إلا للدمار والموت.
نحنا بالتيار ولا يوم كنا ميليشيا ولا رح نكون، كل عمرنا منوقف مع الدولة والجيش والشرعية، واليوم منجدّد دعمنا لرئاسة الجمهورية وكل المؤسسات الدستورية والشرعية على حساب أي ميليشيا. لهيك لمّا بتفشل الدولة وبتربح الميليشيا، منرجع حكماً على الحرب". 
وأردف: "إمّا منتفق على إصلاح الدولة وتحييد لبنان وحمايته من خلال قوته أو منرجع لـ 13 نيسان جديدة مع ضحاياها ودمارها. مقاومة الإحتلال حق، بس الواجب هو بناء دولة تمنع وقوع الإحتلال وتقاومه إذا حصل. الكل قاتلوا وتقاتلوا وقتلوا وإتقتلوا، ممنوع يتكرر القتل. لبنان حتى يكون وطن الرسالة لازم نبني دولة الحق والعدالة والقوة لحماية الأرض والشعب والثروات. الحرب أكيد إنشالله ما بتنعاد، بس لازم نتذكرها لنتعلّم منها. الله يرحم كل الشهداء ويحمي لبنان".